News Desk

2021-03-11 06:24:36 pm IST

ദുബൈ: നിയമങ്ങള്‍ കര്‍ശനമാക്കി ദുബൈ മെട്രോ. മെട്രോ ട്രെയിനുകളും മറ്റ് അനുബന്ധ സംവിധാനങ്ങളും കാത്തുസൂക്ഷിക്കുന്നതിന് ശക്തമായ നിയമങ്ങളാണ് അധികൃതര്‍ നടപ്പാക്കുന്നത്. ഇതിന്റെ ഭാഗമായി നിയമലംഘനങ്ങള്‍ക്ക് കടുത്ത പിഴയും ഈടാക്കുന്നുണ്ട്. 

മറ്റ് ട്രാഫിക് പിഴകളില്‍ നിന്ന് വ്യത്യസ്തമായി, മെട്രോ ഫൈന്‍ ഓണ്‍ലൈനായി അടക്കാനാവില്ല. മറിച്ച് ചില കേന്ദ്രങ്ങളില്‍ നേരിട്ട് ചെന്ന് വേണം അടക്കാന്‍. ഒന്നുകില്‍ പിഴ ചുമത്തുന്ന ഇന്‍സ്പെക്ടര്‍ക്ക് കൈയോടെ നല്‍കാം. ഞായര്‍ മുതല്‍ വ്യാഴം വരെയുള്ള ദിവസങ്ങളില്‍ രാവിലെ എട്ട് മുതല്‍ വൈകിട്ട് 7.30 വരെ അല്‍ ഖലീഫ ഹാപ്പിനെസ് സെന്ററില്‍ ചെന്നും ഫൈന്‍ അടക്കാം. ഇവിടെ നോളജ് ആന്റ് ഇനൊവേഷന്‍ ഫീസ് ആയി 20 ദിര്‍ഹം അധികം അടക്കണം. പിഴ അടക്കുമ്പോള്‍ പിഴ ടിക്കറ്റിലെ നമ്പര്‍ കൈയില്‍ കരുതണം.

പിഴയെ കുറിച്ച് ആക്ഷേപമുണ്ടെങ്കില്‍ പരാതിപ്പെടാനും കഴിയും. 8009090-ലേക്ക് നേരിട്ട് വിളിച്ചോ ask@rta.ae ലേക്ക് ഇമെയിലായോ പരാതിപ്പെടാം. പിഴയുടെ വിശദാംശങ്ങള്‍, എമിറേറ്റ്സ് ഐഡി, പാസ്പോര്‍ട്ട് തുടങ്ങിയ ഏതെങ്കിലും തിരിച്ചറിയല്‍ രേഖയുടെ നമ്പര്‍, നിങ്ങളുടെ പരാതി ശരിയാണ് എന്നതിന് തെളിവ് തുടങ്ങിയവ നല്‍കണം. പിഴ ലഭിച്ച് 30 ദിവസത്തിനുള്ളില്‍ തന്നെ പരാതിപ്പെടണമെന്നും വ്യവസ്ഥയുണ്ട്.

ദുബൈ മെട്രോയിലെ വിവിധ നിയമലംഘനങ്ങള്‍ക്കുള്ള പിഴകള്‍ 

മെട്രോ യാത്രക്കാര്‍ക്ക് അസൗകര്യമുണ്ടാക്കുന്ന ഏതെങ്കിലും രീതിയിലുള്ള പ്രവര്‍ത്തനം- 100 ദിര്‍ഹം

മെട്രോ സീറ്റില്‍ കാല്‍ കയറ്റിവയ്ക്കല്‍- 100 ദിര്‍ഹം

ച്യുയിംഗം ചവക്കല്‍- 100 ദിര്‍ഹം

മെട്രോ ട്രെയിനിലോ സ്റ്റേഷനിലോ എന്തെങ്കിലും സാധനങ്ങള്‍ വില്‍ക്കുകയോ പ്രചരിപ്പിക്കുകയോ ചെയ്യല്‍- 200 ദിര്‍ഹം

മൃഗങ്ങളെ കൂടെ കൊണ്ടുവരല്‍ (കാഴ്ചാപ്രശ്നങ്ങളുള്ളവര്‍ക്ക് വഴികാട്ടുന്ന നായ ഒഴികെ)- 100 ദിര്‍ഹം

മെട്രോയിലോ അനുബന്ധ സംവിധാനങ്ങളിലോ തുപ്പുക, മാലിന്യം വലിച്ചെറിയുക, വൃത്തികേടാക്കുന്ന മറ്റെന്തെങ്കിലും പ്രവൃത്തി- 200 ദിര്‍ഹം

മെട്രോയിലോ പരിസരത്തോ പുകവലിക്കല്‍- 200 ദിര്‍ഹം

മെട്രോയില്‍ മദ്യം കൊണ്ടുപോവല്‍- 500 ദിര്‍ഹം

സ്ത്രീകള്‍, കുട്ടികള്‍ തുടങ്ങിയവര്‍ക്കായി മാറ്റിവയ്ക്കപ്പെട്ട സ്ഥലങ്ങളില്‍ ഇരിക്കല്‍- 100 ദിര്‍ഹം

മെട്രോയ്ക്കകത്ത് വച്ച് ഭക്ഷണം കഴിക്കുകയോ വെള്ളം കുടിക്കുകയോ ചെയ്യല്‍- 100 ദിര്‍ഹം

യാത്രക്കാരുടെ കാത്തിരിപ്പ് ഷെല്‍റ്ററിലോ മറ്റ് നിരോധിത മേഖലകളിലോ ഉറങ്ങല്‍- 300 ദിര്‍ഹം

മെട്രോ സീറ്റോ മറ്റ് ഉപകരണങ്ങളോ കേടുവരുത്തല്‍- 2000 ദിര്‍ഹം

പ്രവേശനമില്ലെന്ന് ബോര്‍ഡ് വച്ച സ്ഥലങ്ങളിലേക്ക് പ്രവേശിക്കല്‍- 100 ദിര്‍ഹം

യാത്രക്കാര്‍ക്ക് അനുവാദമില്ലാത്ത സ്ഥലങ്ങളില്‍ നില്‍ക്കുകയോ ഇരിക്കുകയോ ചെയ്യല്‍- 100 ദിര്‍ഹം

ലിഫ്റ്റോ മറ്റ് സൗകര്യങ്ങളോ ദുരുപയോഗം ചെയ്യല്‍- 100 ദിര്‍ഹം

ശരിയായ വഴിയിലൂടെയല്ലാതെ മെട്രോ അനുബന്ധ പ്രദേശങ്ങളില്‍ പ്രവേശിക്കല്‍- 100 ദിര്‍ഹം

ട്രെയിന്‍ നീങ്ങിക്കൊണ്ടിരിക്കെ മെട്രോയുടെ വാതില്‍ തുറക്കുകയോ അകത്ത് കടക്കാനോ പുറത്തിറങ്ങാനോ ശ്രമിക്കുകയോ ചെയ്യല്‍- 100 ദിര്‍ഹം

എമര്‍ജന്‍സി എക്സിറ്റ് ഉള്‍പ്പെടെ സുരക്ഷാ ഉപകരണങ്ങള്‍ അനാവശ്യമായി ഉപയോഗിക്കല്‍- 2000 ദിര്‍ഹം

മെട്രോയിലെ എമര്‍ജന്‍സി ബട്ടന്‍ ദുരുപയോഗം ചെയ്യല്‍- 2000 ദിര്‍ഹം

യാത്രക്കാരുടെ സുരക്ഷയുമായി ബന്ധപ്പെട്ടവ

മറ്റുള്ളവരുടെ സുരക്ഷ അപകടപ്പെടുത്തുന്നതോ അസൗകര്യമുണ്ടാക്കുന്നതോ ആയ എന്തെങ്കിലും വസ്തുക്കളോ ഉപകരണങ്ങളോ കൈവശം വെക്കല്‍- 100 ദിര്‍ഹം

ആയുധങ്ങള്‍, സ്ഫോടക വസ്തുക്കള്‍, തീപ്പിടിക്കുന്ന സാധനങ്ങള്‍ തുടങ്ങിയവ കൈവശം വെക്കല്‍- 1000 ദിര്‍ഹം

നോല്‍ കാര്‍ഡ് ദുരുപയോഗം

സാധാരണ നോല്‍ കാര്‍ഡ് ഉപയോഗിച്ച് ഗോള്‍ഡ് കാബിനില്‍ പ്രവേശിക്കല്‍- 200 ദിര്‍ഹം

മറ്റൊരാളുടെ നോല്‍ കാര്‍ഡ് ഉപയോഗിക്കല്‍- 200 ദിര്‍ഹം

കാലാവധി കഴിഞ്ഞ നോല്‍ കാര്‍ഡ് ഉപയോഗിക്കല്‍- 200 ദിര്‍ഹം

അസാധുവായ നോല്‍ കാര്‍ഡ് ഉപയോഗിക്കല്‍- 200 ദിര്‍ഹം

വ്യാജ നോല്‍ കാര്‍ഡ് ഉപയോഗിക്കല്‍- 500 ദിര്‍ഹം

അധികൃതരുടെ അനുമതിയില്ലാതെ നോല്‍ കാര്‍ഡ് വില്‍പ്പന നടത്തല്‍- 200 ദിര്‍ഹം

നിര്‍ദ്ദേശങ്ങള്‍ പാലിക്കാതിരിക്കല്‍

ആവശ്യപ്പെട്ടാല്‍ നോല്‍ കാര്‍ഡ് നല്‍കാതിരിക്കല്‍- 200 ദിര്‍ഹം

അനുവദിച്ച സമയത്തേക്കാള്‍ കൂടുതല്‍ മെട്രോ പാര്‍ക്കിംഗില്‍ വാഹനം പാര്‍ക്ക് ചെയ്യല്‍- ദിവസം 100 ദിര്‍ഹം നിരക്കില്‍ 1000 ദിര്‍ഹം വരെ

ആര്‍.ടി.എ ഉദ്യോഗസ്ഥരുമായി സഹകരിക്കാതിരിക്കുകയോ അവരുടെ ജോലി തടസ്സപ്പെടുത്തുകയോ ചെയ്യല്‍-200 ദിര്‍ഹം
.

കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്സ്ആപ്പ് ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക

ALSO WATCH 

Top