News Desk

2021-05-11 11:34:07 am IST
റിയാദ്: ഔദ്യോഗിക സന്ദര്‍ശനത്തിന് ജിദ്ദയിലെത്തിയ ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍ താനി സൗദി കിരീടാവകാശി മുഹമ്മദ് ബിന്‍ സല്‍മാനുമായി കൂടിക്കാഴ്ച നടത്തി. ജിദ്ദയിലെ അല്‍സലാം കൊട്ടാരത്തിലെ റോയല്‍ കോര്‍ട്ടില്‍ വച്ചായിരുന്നു കൂടിക്കാഴ്ച.

സൗദി ഭരണാധികാരി സല്‍മാന്‍ രാജാവിന്റെ ക്ഷണം സ്വീകരിച്ച് തിങ്കളാഴ്ച രാത്രിയാണ് ഖത്തര്‍ അമീര്‍ സൗദിയിലെത്തിയത്. ജിദ്ദ കിങ് അബ്ദുല്‍അസീസ് അന്താരാഷ്ട്ര വിമാനത്താവളത്തില്‍ ഖത്തര്‍ അമീറിനെയും സംഘത്തെയും കിരീടാവകാശി സ്വീകരിച്ചു. സല്‍മാന്‍ രാജാവിന്റെ അഭിവാദ്യങ്ങള്‍ കിരീടാവകാശി ഖത്തര്‍ അമീറിനെ അറിയിച്ചു. സൗദി അറേബ്യ വീണ്ടും സന്ദര്‍ശിക്കാനായതിലും കിരീടാവകാശിയുമായി കൂടിക്കാഴ്ച നടത്താനായതിലുമുള്ള സന്തോഷം ഖത്തര്‍ അമീര്‍ പ്രകടിപ്പിച്ചു. സല്‍മാന്‍ രാജാവിനു അഭിവാദ്യം നേരുകയും ചെയ്തു.

ഇരുരാജ്യങ്ങളും തമ്മിലുള്ള സൗഹൃദവും, വിവിധ മേഖലകളിലെ ഉഭയകക്ഷി സഹകരണം ശക്തിപ്പെടുത്താനുള്ള വഴികളും ഇരു നേതാക്കളും ചര്‍ച്ച ചെയ്തു. പ്രാദേശിക അന്തര്‍ദേശീയ വിഷയങ്ങളും ചര്‍ച്ചയില്‍ വിഷയമായതായി സൗദി പ്രസ് ഏജന്‍സി വ്യക്തമാക്കി. അല്‍ അഖ്‌സ പള്ളിയിലും സമീപത്തും ഇസ്രായേല്‍ സൈന്യം നടത്തുന്ന കൈയേറ്റത്തിന്റെയും അതിക്രമങ്ങളുടെയും പശ്ചാത്തലത്തില്‍ ഇരുനേതാക്കളുടെയും കൂടിക്കാഴ്ചയ്ക്ക് വലിയ പ്രാധാന്യമാണ് കല്‍പ്പിക്കപ്പെടുന്നത്. 

ഇസ്രായേല്‍ അതിക്രമങ്ങളെ സൗദി ഭരണകൂടം ശക്തമായി അപലപിക്കുകയും ഫലസ്തീനികള്‍ക്ക് എല്ലാ പിന്തുണയും വാഗ്ദാനം ചെയ്യുകയും ചെയ്തിരുന്നു. ഇസ്രായേല്‍ സൈന്യത്തിന്റെ ക്രൂരതകളെ ശക്തമായി എതിര്‍ത്ത ഖത്തര്‍ അമീര്‍ ഫലസ്തീന്‍ അതോറിറ്റി പ്രസിഡന്റ് മഹ്മൂദ് അബ്ബാസുമായും ഹമാസ് നേതാവ് ഇസ്മാഈല്‍ ഹനിയ്യയുമായും കഴിഞ്ഞ ദിവസം ചര്‍ച്ചകളും നടത്തിയിരുന്നു.

സൗദി കിരീടാവകാശിയെ കൂടാതെ സൗദി മന്ത്രി പ്രിന്‍സ് തുര്‍ക്കി ബിന്‍ മുഹമ്മദ് ബിന്‍ ഫഹദ്, ഉപപ്രതിരോധ മന്ത്രി പ്രിന്‍സ് ഖാലിദ് ബിന്‍ സല്‍മാന്‍, വിദേശകാര്യമന്ത്രി പ്രിന്‍സ് ഫൈസല്‍ ബിന്‍ ഫര്‍ഹാന്‍, ദേശീയ സുരക്ഷാ ഉപദേഷ്ടാവ് ഡോ. മുസാഇദ് ബിന്‍ മുഹമ്മദ് അല്‍ ഐബാന്‍, പബ്ലിക് ഇന്‍വെസ്റ്റ്മെന്റ് ഫണ്ട് ഗവര്‍ണര്‍ യാസര്‍ ബിന്‍ ഉസ്മാന്‍ അല്‍ റുമയ്യാന്‍ തുടങ്ങിയവരുമുണ്ടായിരുന്നു. 

ഖത്തറിന്റെ ഭാഗത്ത് നിന്ന് ഉപപ്രധാനമന്ത്രിയും വിദേശകാര്യമന്ത്രിയുമായ ഷെയ്ഖ് മുഹമ്മദ് ബിന്‍ അബ്ദുര്‍റഹ്മാന്‍ അല്‍ താനി, ഖത്തര്‍ ഒളിംപിക് കമ്മിറ്റി ചെയര്‍മാന്‍ ഷെയ്ഖ് ജൊവാന്‍ ബിന്‍ ഹമദ് അല്‍ താനി തുടങ്ങിയവരും അമീറിനൊപ്പമുണ്ടായിരുന്നു.


കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്‌സ്ആപ്പ്  ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക 

Top