2019-06-12 05:34:03pm IST
ദോഹ: ഖത്തർ ആതിഥേയത്വം വഹിക്കുന്ന 2022 ഫിഫ ലോകകപ്പ് മാമാങ്കത്തിനായുള്ള തയാറെടുപ്പുകൾ വിശദികരിക്കുന്ന പ്രദർശനം ഈ മാസം 14 മുതൽ 24 വരെ ബ്രസീലിലെ സാവോ പോളോയിൽ നടക്കും. സാവോ പോളോയിലെ ജെകെ ഇഗുയേറ്റ്മി മാളിലാണ് സുപ്രീം കമ്മിറ്റി ഫോർ ഡെലിവറി ആൻഡ് ലെഗസി അധികൃതർ പ്രദർശനം നടത്തുന്നത്.

ജേണി ടു 2022 എന്ന പേരിൽ നടക്കുന്ന പ്രദർശനത്തിൽ ലോകകപ്പ് മത്സരങ്ങൾക്ക് വേദിയാകുന്ന 8 സ്റ്റേഡിയങ്ങളുടെ ചെറു മാതൃകകളും പ്രദർശിപ്പിക്കും. സ്വദേശി പൗരനായ മുഹമ്മദ് അബ്ദുല്ലത്തീഫിന്റെ ശേഖരത്തിൽ നിന്നുള്ള ഫുട്‌ബോൾ ചിത്രങ്ങളും പഴയ കാല ഫുട്‌ബോൾ ടിക്കറ്റുകളുമൊക്കെ പ്രദർശനത്തിലുണ്ടാകും.

കോപ്പ അമേരിക്കയുടെ സംഘാടനത്തെക്കുറിച്ച് അറിയാനും മനസ്സിലാക്കാനുമായി പത്തംഗ പ്രതിനിധി സംഘത്തെയും ഖത്തർ അയയ്ക്കുന്നുണ്ട്. സുപ്രീം കമ്മിറ്റി പ്രതിനിധികൾ കൂടാതെ ഖത്തർ ഫുട്‌ബോൾ അസോസിയേഷൻ, ഖത്തർ സ്റ്റാഴ്‌സ് ലീഗ്, ജോസൂർ ഇൻസ്റ്റിറ്റ്യൂട്ട് എന്നിവിടങ്ങളിൽ നിന്നുള്ള പ്രതിനിധികളാണുള്ളത്. 
Top