News Desk

2021-04-02 01:04:32 pm IST
ദുബൈ: പ്രവാസി ഇന്ത്യക്കാരുടെ ശമ്പളം ആദായ നികുതിയുടെ പരിധിയില്‍ കൊണ്ടുവരുമെന്ന രീതിയിലുള്ള പ്രചാരണങ്ങള്‍ തള്ളി കേന്ദ്ര ധനകാര്യമന്ത്രി നിര്‍മല സീതാരാമന്‍. ഫിനാന്‍സ് ആക്ട് 2021 ഭേദഗതിയില്‍ ഇത്തരമൊരു കാര്യം ഉള്‍പ്പെടുത്തിയിട്ടില്ലെന്ന് മന്ത്രിയെ ഉദ്ധരിച്ച് ധനകാര്യമന്ത്രാലയം ട്വിറ്ററില്‍ അറിയിച്ചു. 

തൃണമൂല്‍ കോണ്‍ഗ്രസ് എം.പി മഹുവ മൊയ്ത്രയുടെ ട്വീറ്റിന് മറുപടിയായാണ് കേന്ദ്ര ധനകാര്യമന്ത്രിയുടെ പ്രസ്താവന. ഗള്‍ഫ് മേഖലയില്‍ ജോലി ചെയ്യുന്ന ഇന്ത്യക്കാരുടെ ശമ്പളം ആദായ നികുതിയുടെ പരിധിയില്‍ നിന്ന് ഒഴിവാക്കിയത് തുടരുമെന്നും ഇക്കാര്യത്തില്‍ പുതിയ തീരുമാനങ്ങള്‍ കൈക്കൊണ്ടിട്ടില്ലെന്നും മന്ത്രി അറിയിച്ചു. 

നിലവിലെ ആദായ നികുതി നിയമത്തില്‍ കൂടുതല്‍ വ്യക്തത കൈവരുത്തുന്നതിനായി ഫിനാന്‍സ് ആക്ട് 2021ല്‍ കൊണ്ടുവന്ന നിര്‍വചനത്തില്‍ പ്രവാസികളുടെ ശമ്പളത്തിന് നികുതി ഈടാക്കാവുന്നതാണ് എന്ന് പറയുക മാത്രമാണ് ചെയ്തതെന്നും അവര്‍ വ്യക്തമാക്കി. 

പുതിയ നിയമം ഗള്‍ഫില്‍ കഴിയുന്ന എന്‍.ആര്‍.ഐ പൗരമാന്‍രുടെ ശമ്പള വരുമാനത്തിലെ നികുതിയുമായി ബന്ധപ്പെട്ട് നിലവിലെ വ്യവസ്ഥയില്‍ നിന്ന് ഒരു മാറ്റവും വരുത്തിയിട്ടില്ലെന്നും അതുകൊണ്ടു തന്നെ നിലവിലെ രീതി തുടരുമെന്നും മന്ത്രി അറിയിച്ചു.

സൗദി, ഒമാന്‍, യു.എ.ഇ, ഖത്തര്‍ എന്നിവിടങ്ങളില്‍ ജോലി ചെയ്യുന്ന ഇന്ത്യന്‍ പ്രവാസികളുടെ ശമ്പളം ആദായ നികുതിയുടെ പരിധിയില്‍ കൊണ്ടുവരാന്‍ ഫിനാന്‍സ് ആട്ക് 2021 വ്യവസ്ഥ ചെയ്യുന്നുവെന്ന രീതിയിലായിരുന്നു തൃണമൂല്‍ എം.പിയുടെ ട്വീറ്റ്. 

ഫിനാന്‍സ് ബില്‍ ഭേദഗതിയിലെ ഒരു ഭാഗത്തിന്റെ ചിത്രം ട്വീറ്റ് ചെയ്തായിരുന്നു എം.പിയുടെ പരാമര്‍ശം. 'സങ്കീര്‍ണമായ വാക്കുകളിലൂടെ' ഗള്‍ഫ് നാടുകളിലെ ഇന്ത്യന്‍ പ്രവാസികള്‍ക്ക് മേല്‍ പുതിയ നികുതി അടിച്ചേല്‍പ്പിച്ചിരിക്കുകയാണ്. ധനകാര്യമന്ത്രി നല്‍കിയ ഉറപ്പ് ലംഘിച്ചിരിക്കുന്നുവെന്നും എം.പി കുറ്റപ്പെടുത്തുകയുണ്ടായി. 

എന്നാല്‍ ഗള്‍ഫ് നാടുകളില്‍ കഠിനാധ്വാനം ചെയ്യുന്നവരില്‍ നിന്ന് ആദായ നികുതി ഈടാക്കാന്‍ ഉദ്ദേശ്യമില്ലെന്നും വസ്തുകള്‍ മനസ്സിലാക്കാതെ ഇത്തരം പ്രസ്താവനകള്‍ നടത്തുന്നത് ആശങ്കാജനകമാണെന്നും മന്ത്രി അഭിപ്രായപ്പെട്ടു. 








ALSO WATCH



കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്സ്ആപ്പ് ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക
Top