2019-07-18 11:15:19am IST

ന്യൂഡല്‍ഹി: ചാരനെന്ന് ആരോപിച്ച് പാക്ക് സൈനിക കോടതി തടവില്‍ പാര്‍പ്പിച്ചിരിക്കുന്ന കുല്‍ഭൂഷണ്‍ ജാദവിന്റെ വധശിക്ഷ പുനപരിശോധിക്കണമെന്നുള്ള അന്താരാഷ്ട്ര നീതിന്യായ കോടതിവിധിയുടെ അടിസ്ഥാനത്തില്‍ ജാദവിനെ വിട്ടയക്കണമെന്ന് ഇന്ത്യ.

ജാദവിനെതിരായ ആരോപണങ്ങള്‍ തെറ്റാണെന്നും അന്താരാഷ്ട്ര കോടതിയുടെ വിധി സ്വാഗതം ചെയ്യുന്നുവെന്നും കേന്ദ്ര വിദേശകാര്യ മന്ത്രി ജയശങ്കര്‍ രാജ്യസഭയില്‍ പറഞ്ഞു. പാര്‍ലമെന്റിന്റെ ഇരുസഭകളിലും രാജ്യാന്തര നീതിന്യായ കോടതിയുടെ വിധിയെ അടിസ്ഥാനമാക്കി വിദേശകാര്യ മന്ത്രി പ്രസ്താവന നടത്തി.

ജാദവിന്റെ കുടുംബം സംയമനത്തോടെയാണ് വിഷയത്തെ സമീപിച്ചത്. രാജ്യം ഒറ്റക്കെട്ടായി നിന്നാണ് ജാദവിന്റെ കുടുംബത്തിന് ഐക്യദാര്‍ഡ്യം പ്രഖ്യാപിച്ചതെന്നും വിദേശകാര്യ മന്ത്രി വ്യക്തമാക്കി.

പാക്ക് സൈനിക കോടതി കുല്‍ഭൂഷണ്‍ ജാദവിന് വിധിച്ച വധശിക്ഷ തടഞ്ഞുകൊണ്ട് അന്താരാഷ്ട്ര നീതിന്യായ കോടതി പുറപ്പെടുവിച്ച വിധി ഇന്ത്യയുടെ വന്‍വിജയമെന്നും അദ്ദേഹം പറഞ്ഞു. രാജ്യസഭാധ്യക്ഷന്‍ വെങ്കയ്യ നായിഡു അന്താരാഷ്ട്ര കോടതി വിധിയെ സ്വാഗതം ചെയ്തു.

 

Top