News Desk

2021-04-12 10:22:59 am IST
റിയാദ്: റമദാന്‍ മാസത്തില്‍ മക്കയിലും മദീനയിലും ഉംറ തീര്‍ത്ഥാടനത്തിനും പ്രാര്‍ഥനകള്‍ക്കുമായി എത്തുന്ന വിശ്വാസികള്‍ക്ക് പുതിയ നിയന്ത്രണങ്ങള്‍ ഏര്‍പ്പെടുത്തി സൗദി ഹജ്ജ് ഉംറ മന്ത്രാലയം. കൊവിഡ് വ്യാപനം തുടരുന്നതിന്റെ പശ്ചാത്തലത്തിലാണ് പുതിയ നിയന്ത്രണങ്ങള്‍ ഏര്‍പ്പെടുത്തിയത്. 

മക്കയിലെ മസ്ജിദുല്‍ ഹറാമിലും മദീനയിലെ മസ്ജിദുന്നബവിയിലും പ്രവേശിക്കുന്നവര്‍ക്കാണ് നിയന്ത്രണങ്ങള്‍ ഏര്‍പ്പെടുത്തിയത്. ഇരു ഹറമുകളില്‍ കൊവിഡ് പ്രതിരോധ വാക്സിന്‍ എടുത്തവര്‍ക്കും കൊവിഡ് രോഗമുക്തി നേടിയവര്‍ക്കും മാത്രമേ പ്രവേശനം അനുവദിക്കൂ.

ഇതുപ്രകാരം മൂന്നു വിഭാഗക്കാരെയാണ് മക്കയിലും മദീനയിലും പ്രവേശിപ്പിക്കുക. വാക്സിന്റെ രണ്ടു ഡോസും എടുത്തവര്‍, ആദ്യ ഡോസ് എടുത്ത ശേഷം 14 ദിവസം പിന്നിട്ടവര്‍, കൊവിഡ് ബാധിച്ച ശേഷം രോഗമുക്തി നേടിയവര്‍ എന്നിങ്ങനെ മൂന്ന് വിഭാഗങ്ങള്‍ക്കു മാത്രമായിരിക്കും പ്രവേശനം.

തവക്കല്‍നാ മൊബൈല്‍ ആപ്പില്‍ വാക്സിനെടുത്തതിന്റെ വിവരങ്ങള്‍ ലഭ്യമാക്കുന്നവര്‍ക്ക് മാത്രം അനുവാദം നല്‍കാനാണ് മന്ത്രാലയത്തിന്റെ തീരുമാനം.

അതേസമയം, ഉംറ തീര്‍ത്ഥാടനം നിര്‍വഹിക്കുന്നവര്‍ക്കൊപ്പം കുട്ടികള്‍ക്ക് മക്കയില്‍ പ്രവേശനം നല്‍കില്ലെന്നും മന്ത്രാലയം പുതുക്കിയ നിര്‍ദേശത്തില്‍ പറയുന്നു. മക്കയിലെ മസ്ജിദുല്‍ ഹമാമിലും മദീനയിലെ മസ്ജിദുന്നബവിയിലും കുട്ടികളെ പ്രവേശിപ്പിക്കില്ല.

നിലവില്‍ കുട്ടികള്‍ക്ക് വാക്സിന്‍ നല്‍കുന്നില്ലെന്നതിനാലാണ് പ്രവേശന വിലക്ക്. കുട്ടികള്‍ പള്ളികളിലും മറ്റ് ആരാധനാ സ്ഥലങ്ങളിലും വരുന്നത് അവരുടെ ആരോഗ്യ സുരക്ഷയെ അപകടപ്പെടുത്തുമെന്നും അധികൃതര്‍ വ്യക്തമാക്കുന്നു.

റമദാനില്‍ ഉംറ നിര്‍വഹിക്കുന്നതിനും മക്ക, മദീന പള്ളികളില്‍ നമസ്‌ക്കാരങ്ങള്‍ നിര്‍വഹിക്കുന്നതിനും തവക്കല്‍നാ ആപ്പ് വഴി മുന്‍കൂര്‍ പെര്‍മിറ്റ് എടുക്കണം. ഉംറ തീര്‍ഥാടനത്തിന് ബുക്ക് ചെയ്യുന്നവര്‍ക്ക് രാവിലെയും രാത്രിയുമായി ഏഴ് സ്ലോട്ടുകളിലായാണ് പെര്‍മിറ്റ് നല്‍കുക. 

ആളുകളുടെ തിരക്ക് ഒഴിവാക്കുന്നതിന് വേണ്ടിയാണിത്. അഞ്ചു നേരങ്ങളിലെ പ്രാര്‍ഥനകള്‍ക്ക് വരുന്നവരും പെര്‍മിറ്റ് എടുക്കണം. രാത്രി ഇശാ നമസ്‌ക്കാരത്തിന് പെര്‍മിറ്റെടുത്തവര്‍ക്ക് അതിനു ശേഷം നടക്കുന്ന തറാവീഹ് നമസ്‌കാരത്തിലും പങ്കെടുക്കാമെന്നും മന്ത്രാലയം അറിയിച്ചു.

മക്കയിലെ സെന്‍ട്രല്‍ ഹറം ഏരിയയിലേക്ക് അനധികൃത വാഹനങ്ങള്‍ പ്രവേശിപ്പിക്കില്ലെന്നും അധികൃതര്‍ വ്യക്തമാക്കി. പെര്‍മിറ്റില്‍ പറയുന്ന വാഹനങ്ങള്‍ക്ക് മാത്രമായിരിക്കും പ്രവേശനം. പെര്‍മിറ്റില്‍ പറയുന്ന സമയത്ത് മാത്രമേ ഇവ മക്കയിലേക്കുള്ള ചെക്ക്പോയിന്റുകള്‍ എത്താന്‍ പാടുള്ളൂ. 

പെര്‍മിറ്റില്ലാതെയോ സമയക്രമം തെറ്റിച്ചോ വരുന്ന വാഹനങ്ങള്‍ക്ക് പ്രവേശനാനുമതി നല്‍കില്ല. ഇഅ്തമര്‍നാ ആപ്പ് വഴിയാണ് വാഹന ടിക്കറ്റ് എടുക്കേണ്ടത്.

പെര്‍മിറ്റില്ലാതെയോ വ്യാജ പെര്‍മിറ്റ് ഉപയോഗിച്ചോ ഉംറ ചെയ്യാന്‍ എത്തുന്നവര്‍ക്ക് 10,000 റിയാലും ഈ രീതിയില്‍ നമസ്‌ക്കാരത്തിനെത്തുന്നവര്‍ക്ക് 1,000 റിയാലും പിഴ ചുമത്തുമെന്നും അധികൃതര്‍ മുന്നറിയിപ്പ് നല്‍കി.

മക്കയിലും മദീനയിലും പ്രവേശിക്കുന്നവര്‍ കൊവിഡ് പെരുമാറ്റച്ചട്ടങ്ങള്‍ കൃത്യമായി പാലിക്കാന്‍ ബാധ്യസ്ഥരായിരിക്കുമെന്നും മന്ത്രാലയം അറിയിച്ചു.മാസ്‌ക് ധരിക്കുക, സാമൂഹ്യ അകലം പാലിക്കല്‍, ഇഫ്താര്‍ വിഭവങ്ങള്‍ പരസ്പരം പങ്കുവയ്ക്കാതിരിക്കല്‍ തുടങ്ങിയ നിര്‍ദ്ദേശങ്ങള്‍ പാലിക്കണം. 

സാമൂഹ്യ അകലം പാലിച്ച് ഉംറ തീര്‍ത്ഥാടനം നിര്‍വഹിക്കുന്നതിന് സൗകര്യമൊരുക്കുന്നതിന്റെ ഭാഗമായി നേരത്തേ 50,000 പേര്‍ക്ക് ഉംറ ചെയ്യാന്‍ സൗകര്യമുണ്ടായിരുന്ന സ്ഥാനത്ത് അത് ഒരു ലക്ഷം പേര്‍ക്ക് തീര്‍ത്ഥാടനം നിര്‍വഹിക്കാവുന്ന രീതിയില്‍ സൗകര്യങ്ങള്‍ വിപുലീകരിച്ചതായും മന്ത്രാലയം അറിയിച്ചു. പുതിയ നിയന്ത്രണങ്ങള്‍ റമദാനും ശേഷവും തുടരുമെന്നാണ് സൂചന.


കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്‌സ്ആപ്പ് ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക
Top