2019-08-29 03:08:42am IST
കുവൈത്തില്‍ ആശ്രിത വിസക്ക് നിയന്ത്രണം. വിദേശികളുടെ 12 വയസ്സിനു മുകളിലുള്ള മക്കള്‍ക്ക്‌ കുടുംബ വിസ നല്‍കുന്നതിനു വിലക്ക്‌ ഏര്‍പ്പെടുത്തിയതായി താമസ കാര്യ വിഭാഗം വൃത്തങ്ങളെ ഉദ്ധരിച്ച്‌ പ്രാദേശിക അറബ്‌ ദിന പത്രം റിപ്പോര്‍ട്ട്‌ ചെയ്തു.

നിലവില്‍ ആണ്‍കുട്ടികള്‍ക്ക്‌ 15 വയസ്സും, അവിവാഹിതരായ പെണ്‍ കുട്ടികള്‍ക്ക്‌ 18 വയസുമായിരുന്നു വിസ ലഭിക്കുന്നതിനുള്ള പ്രായ പരിധി.എന്നാല്‍ ഇനി മുതല്‍ 12 വയസ്സ് പൂര്‍ത്തിയായ മക്കള്‍ക്ക് പുതിയതായി കുടുംബ ആശ്രിത വിസ അനുവദിക്കുന്നതല്ല.

ഇതിനു പുറമെ 7 രാജ്യങ്ങളില്‍ നിന്നുള്ള പൗരന്മാര്‍ക്ക്‌ കുടുംബ വിസ നല്‍കുന്നത്‌ നിര്‍ത്തലാക്കിയതായും പത്രം റിപ്പോര്‍ട്ട്‌ ചെയ്യുന്നു.കുടുംബ വിസ ലഭിക്കുന്നതിനുള്ള കുറഞ്ഞ ശമ്ബള പരിധി 450 ദിനാറില്‍ നിന്നും 500 ദിനാറായി ഉയര്‍ത്തിയതിനു തൊട്ടു പിന്നാലെയാണു പുതിയ നിയമം നടപ്പില്‍ വരുത്താന്‍ ആലോചിക്കുന്നത്‌.
Top