News Desk

2021-03-22 05:13:08 pm IST


ദുബൈ: അഞ്ച് വര്‍ഷം മുമ്പ് സ്‌പോണ്‍സറുടെ വീട്ടില്‍ നിന്ന് 30,000 ദിര്‍ഹമുമായി നാടുവിട്ട രണ്ട് വീട്ടു ജോലിക്കാര്‍ ദുബൈ അന്താരാഷ്ട്ര വിമാനത്താവളത്തില്‍ പിടിയില്‍. നാട്ടില്‍ നിന്ന് വിമാനമിറങ്ങിയ ഉടന്‍ ദുബൈ പൊലീസ് ഇവരെ പിടികൂടുകയായിരുന്നു.

സ്‌പോണ്‍സറും കുടുംബവും അവധിക്കാലം ആഘോഷിക്കാന്‍ വേണ്ടി വിദേശത്തുപോയ സമയത്തായിരുന്നു 30,000 ദിര്‍ഹം മോഷ്ടിച്ച് ഇരുവരും നാട്ടിലേക്ക് കടന്നത്. ഡ്രൈവറുടെ കൈവശം സ്‌പോണ്‍സര്‍ ഏല്‍പ്പിച്ചിരുന്ന പാസ്‌പോര്‍ട്ട് അവരറിയാതെ കൈക്കലാക്കിയായിരുന്നു ഇവര്‍ യു.എ.ഇ വിട്ടത്. 

സ്‌പോണ്‍സറുടെ മക്കള്‍ വീട്ടിലെ അലമാരയില്‍ സൂക്ഷിച്ചിരുന്ന പണമാണ് ഇവര്‍ കവര്‍ന്നത്. വീട്ടുജോലിക്കാരെ കാണാതായതിനെ തുടര്‍ന്ന് വീട്ടിലെ ഡ്രൈവറാണ് വിവരം വിദേശയാത്രയിലായിരുന്ന സ്‌പോണ്‍സറെ അറിയിച്ചത്. തന്റെ കൈവശം സൂക്ഷിക്കാന്‍ ഏല്‍പ്പിച്ചിരുന്ന പാസ്‌പോര്‍ട്ട് കാണാതായതായും ഡ്രൈവര്‍ പറഞ്ഞു.

യാത്ര കഴിഞ്ഞ് തിരികെയെത്തിയ സ്‌പോണ്‍സറും കുടുംബവും നടത്തിയ അന്വേഷണത്തിലാണ് അലമാരയില്‍ സൂക്ഷിച്ച 30,000 ദിര്‍ഹം കാണാനില്ലെന്ന കാര്യം കണ്ടെത്തിയത്. വീട്ടുവേലക്കാര്‍ക്ക് മാത്രമാണ് എല്ലാ മുറികളിലും പ്രവേശനമുള്ളത് എന്നതിനാല്‍ അവരായിരിക്കാം പണം എടുത്തത് എന്ന നിഗമനത്തില്‍ ഇരുവര്‍ക്കുമെതിരെ പൊലീസില്‍ പരാതിയും നല്‍കി. 

അന്വേഷണത്തില്‍ പാസ്‌പോര്‍ട്ട് കാണാതായ ദിവസം തന്നെ അവര്‍ യു.എ.ഇ വിട്ടതായി കണ്ടെത്തുകയായിരുന്നു. തുടര്‍ന്ന് എല്ലാ വിമാനത്താവളങ്ങളിലും ഇവരെ കരിമ്പട്ടികയില്‍ ഉള്‍പ്പെടുത്തിയതായി വിവരം നല്‍കുകയും ചെയ്തു. ഇതിന്റെ അടിസ്ഥാനത്തിലാണ് അഞ്ചു വര്‍ഷത്തിനു ശേഷം വിമാനത്താവളത്തില്‍ എത്തിയ ഉടന്‍ സുരക്ഷാ ഉദ്യോഗസ്ഥര്‍ ഇരുവരെയും അറസ്റ്റ് ചെയ്തത്.

തുടര്‍ന്ന് നടത്തിയ ചോദ്യം ചെയ്യലില്‍ 30,000 ദിര്‍ഹം മോഷ്ടിച്ച കാര്യം സമ്മതിച്ച ഇരുവരും ഡ്രൈവര്‍ അറിയാതെയാണ് അവരുടെ പക്കലുണ്ടായിരുന്ന പാസ്‌പോര്‍ട്ടുകള്‍ കൈക്കലാക്കി നാട്ടിലേക്ക് കടന്നതെന്നും പൊലീസിനെ അറിയിച്ചു. ഇരുവരുടെയും കേസ് തുടര്‍ നടപടികള്‍ക്കായി പബ്ലിക് പ്രോസിക്യൂഷന് കൈമാറിയതായി ദുബൈ പൊലീസ് അറിയിച്ചു.


കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്സ്ആപ്പ് ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക
Top