News Desk

2021-03-30 10:26:21 am IST
മസ്‌കത്ത്: പ്രവാസികള്‍ക്ക് ഒമാന്‍ പൗരത്വം അനുവദിച്ച് നല്‍കിയതായി റിപ്പോര്‍ട്ട്. പുതുതായി 39 പേര്‍ക്കാണ് പൗരത്വം അനുവദിച്ച് നല്‍കിയത്. ഇതോടെ ഈ വര്‍ഷം ഒമാന്‍ പൗരത്വം നേടിയ വിദേശികളുടെ എണ്ണം 196 ആയതായി പ്രാദേശിക മാധ്യമം റിപ്പോര്‍ട്ട് ചെയ്തു.

ഒമാന്‍ സുല്‍ത്താന്‍ ഹൈതം ബിന്‍ താരിഖ് കഴിഞ്ഞ ദിവസം പുറപ്പെടുവിച്ച രാജകീയ ഉത്തരവ് പ്രകാരമാണ് 39 ഓളം പ്രവാസികള്‍ക്ക് പൗരത്വം ലഭിച്ചത്. ഫെബ്രുവരിയില്‍ രാജ്യത്ത് താമസിക്കുന്ന 157 പ്രവാസികള്‍ക്കാണ് പൗരത്വം ലഭിച്ചത്.

ഒമാന്‍ പൗരത്വവും പാസ്പോര്‍ട്ടും നേടാന്‍ ആഗ്രഹിക്കുന്ന പ്രവാസികള്‍ 600 ഒമാന്‍ റിയാല്‍ വിലമതിക്കുന്ന അപേക്ഷ സമര്‍പ്പിക്കണം. അതേസമയം, ഒമാന്‍ പൗരന്മാരുടെ പങ്കാളിയോ മുന്‍ പങ്കാളിയോ 300 ഒമാന്‍ റിയാലാണ് അടയ്ക്കേണ്ടതെന്ന് ആഭ്യന്തര മന്ത്രാലയം അറിയിച്ചു.

ഒമാനില്‍ താമസിക്കുന്നുണ്ടെന്നും ജോലി ചെയ്യുന്നുണ്ടെന്നും അപേക്ഷകര്‍ തെളിയിക്കണം. മാത്രമല്ല, അപേക്ഷകര്‍ക്കെതിരെ കേസുകളൊന്നും ഉണ്ടാകാന്‍ പാടില്ല. പകര്‍ച്ചവ്യാധികളൊന്നും അവര്‍ക്കില്ലെന്നുള്ള മെഡിക്കല്‍ സര്‍ട്ടിഫിക്കറ്റ് സമര്‍പ്പിക്കണം.

മന്ത്രാലയം പുറത്തിറക്കിയ എക്സിക്യൂട്ടീവ് റെഗുലേഷന്‍ 92/2019 പ്രകാരം, ഒമാന്‍ പൗരത്വത്തിനുള്ള അപേക്ഷയ്ക്ക് 600 (ഒഎംആര്‍) ചെലവാകും. ഒമാന്‍ പൗരത്വം ഉപേക്ഷിക്കുന്നതിനോ അല്ലെങ്കില്‍ തിരികെ നല്‍കുന്നതിനോ അപേക്ഷിക്കുന്നതിന് നിയമപ്രകാരം 200 റിയാല്‍ ചെലവാകും.

ഒമാനി പൗരത്വം നേടുന്ന ആര്‍ക്കും ഒമാന്‍ പാസ്പോര്‍ട്ട് ലഭിക്കാന്‍ മന്ത്രാലയത്തില്‍ റിപ്പോര്‍ട്ട് ചെയ്യണം. കൂടാതെ, ഒമാനില്‍ ദീര്‍ഘകാല താമസക്കാരനായി തുടരുകയും വേണം. പ്രായപൂര്‍ത്തിയാകാത്ത കുട്ടികള്‍ക്ക് ആറു മാസത്തിനുള്ളില്‍ പൗരത്വം ലഭിക്കും

ഈ നടപടിക്രമം ആരംഭിക്കുന്ന പ്രവാസികള്‍ക്ക് അറബി ഭാഷാ പരീക്ഷ നടത്തേണ്ടിവരും. അല്ലെങ്കില്‍ മന്ത്രാലയത്തില്‍ തന്നെ അറബിയില്‍ ഒരു അഭിമുഖം നടത്താം. പരീക്ഷയില്‍ പരാജയപ്പെടുന്ന പ്രവാസികള്‍ക്ക് ആറുമാസം കഴിഞ്ഞാല്‍ വീണ്ടും പരീക്ഷ എഴുതാം. നാല് അവസരങ്ങളാണ് പരീക്ഷ എഴുതാനായി നല്‍കുന്നത്.

ആഭ്യന്തര മന്ത്രാലയത്തില്‍ നിന്ന് പെര്‍മിറ്റ് ലഭിച്ചില്ലെങ്കില്‍ ഒമാനിലെ പുതിയ പൗരന്മാര്‍ക്ക് പൗരത്വം ലഭിച്ചതിന് ശേഷം പത്തു വര്‍ഷത്തിനുള്ളില്‍ രാജ്യത്തിന് പുറത്ത് ആറ് മാസം ഒരേസമയം ചെലവഴിക്കാന്‍ സാധിക്കില്ല. ജനങ്ങള്‍ക്ക് സുല്‍ത്താനേറ്റിന്റെ ആഭ്യന്തര മന്ത്രാലയത്തില്‍ ഒമാനി പൗരത്വത്തിനായി അപേക്ഷിക്കാം.


കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്സ്ആപ്പ് ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക


Top