News Desk

2021-05-09 01:49:51 pm IST

ദോഹ: ജറുസലേമില്‍ ഫലസ്തീനികള്‍ക്കെതിരായ ഇസ്രായേല്‍ ആക്രമണങ്ങളുടെ പശ്ചാത്തലത്തില്‍ അറബ് ലീഗിന്റെ സ്ഥിരം പ്രതിനിധികള്‍ പങ്കെടുക്കുന്ന അസാധാരണ യോഗം തിങ്കളാഴ്ച്ച നടക്കും. നിലവിലെ പ്രസിഡന്റ് എന്ന നിലയില്‍ ഖത്തര്‍ ആണ് യോഗത്തില്‍ അധ്യക്ഷം വഹിക്കുക. 

ഫലസ്തീന്റെ അഭ്യര്‍ത്ഥന പ്രകാരമാണ് യോഗം വിളിച്ചിരിക്കുന്നതെന്ന് അറബ് ലീഗ് അസിസ്റ്റന്റ് സെക്രട്ടറി ജനറല്‍ അംബാസഡര്‍ ഹുസ്സാം സാക്കി പറഞ്ഞു. അധിനിവേശ ജറുസലേമിലെ മസ്ജിദുല്‍ അഖ്‌സ ഉള്‍പ്പെടെയുള്ള പുണ്യസ്ഥലങ്ങളില്‍ ഇസ്രായേല്‍ അതിക്രമം തുടരുന്ന പശ്ചാത്തലത്തിലാണ് ഫലസ്തീന്‍, അറബ് രാജ്യങ്ങളുടെ പിന്തുണ തേടിയത്. 

റമദാനിലെ അവസാന വെള്ളിയാഴ്ച്ച അല്‍ അഖ്‌സ പള്ളിയില്‍ ഇസ്രായേല്‍ സൈന്യവും പൊലിസും നടത്തിയ വെടിവെപ്പില്‍ നിരവധി പേര്‍ക്ക് പരിക്കേറ്റിരുന്നു. ശെയ്ഖ് ജര്‍റാഹ് പ്രദേശത്ത് നിന്ന് ഫലസ്തീനികളെ കുടിയൊഴിപ്പിക്കാനുള്ള ശ്രമങ്ങളും ഇസ്രായേല്‍ നടത്തുന്നുണ്ട്.

മസ്ജിദുല്‍ അഖ്‌സ നില്‍ക്കുന്ന പ്രദേശത്ത് നിന്ന് ഫലസ്തീനികളെ പൂര്‍ണമായി നീക്കാനുള്ള ശ്രമങ്ങളാണ് നടക്കുന്നത്. ഇക്കാര്യങ്ങള്‍ യോഗം ചര്‍ച്ച ചെയ്യും. ഇസ്രായേല്‍ അതിക്രമങ്ങളെ ഗള്‍ഫ് രാജ്യങ്ങള്‍ കഴിഞ്ഞ ദിവസം ശക്തമായി അപലപിച്ചിരുന്നു. 

പുതിയ പ്രതിസന്ധിയുടെ പശ്ചാത്തലത്തില്‍ ഫലസ്തീന്‍ പ്രസിഡന്റ് മഹ്മൂദ് അബ്ബാസുമായും ഹമാസ് പൊളിറ്റിക്കല്‍ ബ്യൂറോ തലവന്‍ ഇസ്മാഈല്‍ ഹനിയ്യയുമായും ഖത്തര്‍ അമീര്‍ ശെയ്ഖ് തമീം ബിന്‍ ഹമദ് അല്‍ത്താനി ഫോണില്‍ സംസാരിച്ചു. ഫലസ്തീനികളുടെ അവകാശങ്ങള്‍ നേടിയെടുക്കുന്ന കാര്യത്തില്‍ ഖത്തറിന്റെ എല്ലാ പിന്തുണയും അമീര്‍ വാദഗാനം ചെയ്തു.


കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്‌സ്ആപ്പ്  ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക


Top