News Desk

2021-03-15 05:58:44 pm IST

ജിദ്ദ: സൗദിയില്‍ പുതിയ തൊഴില്‍ നിയമം നടപ്പായതോടെ പ്രവാസികള്‍ക്ക് നാട്ടിലേയ്ക്ക് പോകുന്നതിനുള്ള വിസ ലഭിക്കുക ഇനി എളുപ്പമാവും. പ്രവാസികള്‍ റീ എന്‍ട്രി, ഫൈനല്‍ എക്‌സിറ്റ് വിസകള്‍ക്ക് അപേക്ഷ നല്‍കി 10 ദിവസത്തിനകം വിസ ലഭ്യമാക്കണമെന്നാണ് പുതിയ നിയമം വ്യവസ്ഥ ചെയ്യുന്നത്. 

പുതിയ നിയമ പരിഷ്‌കാരത്തിന്റെ പശ്ചാത്തലത്തില്‍ സൗദി മാനവ വിഭവശേഷി, സാമൂഹിക വികസന മന്ത്രാലയം പുറത്തിറക്കിയ യൂസര്‍ മാന്വുവലിലാണ് ഇക്കാര്യം വ്യക്തമാക്കുന്നത്. 

സൗദിയില്‍ നിന്ന് നാട്ടില്‍ പോയി തിരികെ എത്തുന്നതിനുള്ള എക്‌സിറ്റ് ആന്റ് റീ എന്‍ട്രി വിസക്കോ ജോലി മതിയാക്കി പോകുന്നതിനുള്ള ഫൈനല്‍ എക്‌സിറ്റ് വിസക്കോ വേണ്ടി തൊഴിലാളി ഓണ്‍ലൈനായാണ് അപേക്ഷ സമര്‍പ്പിക്കേണ്ടത്. അപേക്ഷ നല്‍കിയ ശേഷം 10 ദിവസം കാത്തിരിക്കണം. 

തൊഴിലുടമയ്ക്ക് ജീവനക്കാരന്റെ അപേക്ഷ സംബന്ധിച്ച് മനസ്സിലാക്കാനുള്ള കാലയളവാണ്. 10 ദിവസത്തിനുള്ളില്‍ തൊഴിലുടമ അപേക്ഷയോട് പ്രതികരിക്കുന്നില്ലെങ്കില്‍ അപേക്ഷ അംഗീകരിക്കപ്പെട്ടതായി കണക്കാക്കും. റീ എന്‍ട്രി വിസയാണെങ്കില്‍ അപേക്ഷ നല്‍കി 10 ദിവസത്തെ കാലാവധി കഴിഞ്ഞ് അഞ്ച് ദിവസത്തിന് ശേഷം 30 ദിവസം കാലാവധിയുള്ള സിംഗിള്‍ വിസ ലഭിക്കും.

അതേസമയം, തൊഴില്‍ കരാര്‍ കാലാവധി അവസാനിച്ച ശേഷമാണെങ്കില്‍ എക്‌സിറ്റ് ആന്റ് റീ എന്‍ട്രി വിസ അടിക്കാനാവില്ല. മള്‍ട്ടിപ്പിള്‍ റീ എന്‍ട്രി വിസയും സ്വന്തമായി അടിയ്ക്കാന്‍ തൊഴിലാളിക്ക് കഴിയില്ല. തൊഴിലാളിയുടെ റീ എന്‍ട്രി, ഫൈനല്‍ എക്സിറ്റ് വിസകള്‍ റദ്ദ് ചെയ്യാന്‍ തൊഴിലുടമയ്ക്കും കഴിയില്ല. 

അതേസമയം, പ്രവാസി തൊഴിലാളിക്ക് റീ എന്‍ട്രി, ഫൈനല്‍ എക്സിറ്റ്, മള്‍ട്ടിപ്പിള്‍ റീ എന്‍ട്രി വിസകള്‍ ഉഭയ സമ്മതത്തോടെ നല്‍കുന്ന പഴയ രീതി പുതിയ കരാര്‍ വ്യവസ്ഥയിലും തുടരാമെന്നും മന്ത്രാലയത്തിന്റെ യൂസര്‍ മാന്വുവലില്‍ പറയുന്നു.

ഫൈനല്‍ എക്‌സിറ്റ് വിസയുടെ കാര്യത്തില്‍ അപേക്ഷ നല്‍കി 10 ദിവസത്തിനകം വിസ ലഭിക്കും. എന്നാല്‍, 15 ദിവസത്തെ കാലാവധി മാത്രമേ വിസയ്ക്ക് ലഭിക്കുകയുള്ളൂ. തൊഴില്‍ കരാര്‍ തീരുന്നതിന് മുമ്പാണ് പ്രവാസി തൊഴിലാളി ഫൈനല്‍ എക്‌സിറ്റ് വിസയില്‍ രാജ്യം വിടുന്നതെങ്കില്‍ പിന്നീട് സൗദിയിലേക്ക് ആജീവനാന്ത വിലക്കുണ്ടാകുമെന്നും പുതിയ മാര്‍ഗരേഖ വ്യക്തമാക്കി. 

റീഎന്‍ട്രി വിസയില്‍ രാജ്യത്തിന് പുറത്ത് പോയി കരാര്‍ കാലാവധി പൂര്‍ത്തിയാക്കുന്നതിനായി വിസ കാലാവധി തീരുന്നതിന് മുമ്പ് രാജ്യത്തേയ്ക്ക് തിരിച്ചെത്താത്തവര്‍ക്കും ആജീവനാന്ത വിലക്ക് ബാധകമായിരിക്കും. എന്നാല്‍, ഇത്തരം കേസുകളില്‍ വിസ നീട്ടി നല്‍കാനുള്ള അവകാശം തൊഴിലുടമയ്ക്ക് ഉണ്ടായിരിക്കും.

പുതിയ നിയമ പരിഷ്‌കരണം അനുസരിച്ച് പ്രവാസി ജീവനക്കാരന്‍ മറ്റൊരു സ്ഥാപനത്തിലേക്ക് തൊഴില്‍ മാറുന്നെങ്കില്‍ പുതുതായി ചേരുന്ന സ്ഥാപനം, തൊട്ടുമുമ്പത്തെ മൂന്ന് മാസം 80 ശതമാനത്തില്‍ കുറയാത്ത തോതില്‍ സൗദിയിലെ വേതന സംരക്ഷണ പദ്ധതി വ്യവസ്ഥകള്‍ പാലിച്ചിരിക്കണമെന്നും വ്യവസ്ഥയുണ്ട്. 

മാത്രമല്ല, സ്ഥാപനത്തിലെ മുഴുവന്‍ ജീവനക്കാരുടെയും തൊഴില്‍ കരാറുകളും മന്ത്രാലയത്തിന്റെ ഓണ്‍ലൈന്‍ പോര്‍ട്ടലില്‍ അപ്‌ലോഡ് ചെയ്തിരിക്കുകയും വേണം. ഒപ്പം സ്വയം വിലയിരുത്തല്‍ പ്രോഗ്രാമുമായി ബന്ധപ്പെട്ട 80 ശതമാനം വ്യവസ്ഥകളെങ്കിലും കമ്പനി പാലിച്ചിരിക്കുകയും വേണം.

അതേസമയം, രാജ്യത്തെ തൊഴില്‍ നിയമം ബാധകമായ പ്രൊഫഷനില്‍ ജോലി ചെയ്യുന്ന പ്രവാസികള്‍ക്ക് മാത്രമാണ് ഇങ്ങനെ തൊഴില്‍ മാറാന്‍ സാധിക്കൂ. അതോടൊപ്പം തൊഴിലാളി ആദ്യമായി സൗദിയില്‍ എത്തിയവരാണെങ്കില്‍ ആദ്യ തൊഴിലുടമയുടെ കീഴില്‍ ചുരുങ്ങിയത് 12 മാസമെങ്കിലും ജോലി ചെയ്ത ശേഷമേ തൊഴില്‍ മാറ്റം സാധ്യമാകൂ എന്നും വ്യവസ്ഥയുണ്ട്. 

ഒരേസമയം ഒന്നില്‍ കൂടുതല്‍ തൊഴില്‍ മാറ്റത്തിന് അപേക്ഷിച്ചവരും ആയിരിക്കാനും പാടില്ല. അതായത് തൊഴില്‍ മാറ്റത്തിനുള്ള ആദ്യ അപേക്ഷയില്‍ തീരുമാനമായ ശേഷം മാത്രമേ രണ്ടാമത്തെ അപേക്ഷ നല്‍കാന്‍ പാടുള്ളൂ. നിലവിലെ തൊഴിലുടമയുമായി ഏര്‍പ്പെട്ടിരിക്കുന്ന തൊഴില്‍ കരാറില്‍ പറഞ്ഞതു പ്രകാരമുള്ള നോട്ടീസ് കാലാവധി കഴിഞ്ഞ ശേഷം മാത്രമേ തൊഴില്‍ മാറാനാവൂ. 

വീട്ടു ഡ്രൈവര്‍, ഹോം ഗാര്‍ഡ്, വീട്ടുജോലിക്കാരന്‍, ഇടയന്‍, തോട്ടക്കാരന്‍ എന്നിങ്ങനെ അഞ്ച് വിഭാഗങ്ങളിലൊഴികെ സ്വകാര്യ മേഖലയിലെ എല്ലാ പ്രവാസി തൊഴിലാളികള്‍ക്കും പുതിയ പരിഷ്‌കാരത്തിന്റെ ആനുകൂല്യങ്ങള്‍ ലഭിക്കുമെന്നും മന്ത്രാലയം വ്യക്തമാക്കി.


കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്സ്ആപ്പ് ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക

ALSO WATCH 

Top