News Desk

2021-05-04 10:23:59 pm IST

മസ്‌ക്കറ്റ്: കൊവിഡ് വ്യാപനം രൂക്ഷമായ സാഹചര്യത്തില്‍ ആരോഗ്യ പ്രവര്‍ത്തകരുടെ രാജി അപേക്ഷകള്‍ ഇനിയൊരു അറിയിപ്പുണ്ടാവുന്നതുവരെ സ്വീകരിക്കില്ലെന്ന് ഒമാന്‍ ആരോഗ്യ മന്ത്രാലയം അറിയിച്ചു. ഇതുമായി ബന്ധപ്പെട്ട സര്‍ക്കുലര്‍ രാജ്യത്തെ എല്ലാ ആരോഗ്യ സ്ഥാപനങ്ങള്‍ക്കും അയച്ചു.

കൊവിഡിനെതിരായ ഭരണകൂടത്തിന്റെ പോരാട്ടം ശക്തമായി തുടരാനും രാജ്യത്തെ ആരോഗ്യ മേഖലയുടെ കാര്യക്ഷമത കാത്തുസൂക്ഷിക്കാനുമാണ് ഇത്തരമൊരു തീരുമാനം കൈക്കൊണ്ടതെന്ന് ആരോഗ്യ മന്ത്രി ഡോ. അഹ്മദ് ബിന്‍ മുഹമ്മദ് അല്‍ സഈദി അറിയിച്ചു.

രാജ്യത്തെ കൊവിഡ് വ്യാപനത്തിന്റെ നിലവിലെ സ്ഥിതി പരിഗണിച്ചും വരും ദിനങ്ങളില്‍ വ്യാപനത്തിന്റെ തോത് കൂടാമെന്ന റിപ്പോര്‍ട്ടുകളുടെ അടിസ്ഥാനത്തിലുമാണ് പകര്‍ച്ച വ്യാധി തടയല്‍ നിയമപ്രകാരമുള്ള നടപടിയെന്ന് സര്‍ക്കുലറില്‍ പറയുന്നു. 

രാജ്യത്ത് കൊവിഡ് രൂക്ഷമായ സാഹചര്യത്തില്‍ എല്ലാ ആശുപത്രികളിലും അധിക കൊവിഡ് വാര്‍ഡുകള്‍ തുറക്കുകയും ബെഡ്ഡുകളുടെ എണ്ണം വര്‍ധിപ്പിക്കുകയും ചെയ്തിരുന്നു. കൂടുതല്‍ മരുന്നുകളും ഓക്സിജന്‍ ഉപകരണങ്ങളും വെന്റിലേറ്ററുകളും സജ്ജമാക്കിയിട്ടുണ്ട്. പല ആശുപത്രികളിലെയും അടിയന്തരമല്ലാത്ത കൊവിഡ് ഇതര ചികില്‍സകള്‍ നിര്‍ത്തിവച്ചിട്ടുമുണ്ട്.


കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്‌സ്ആപ്പ്  ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക
Top