News Desk

2021-06-09 04:17:32 pm IST

ന്യൂഡല്‍ഹി: പ്രധാനമന്ത്രി നരേന്ദ്ര മോദിക്ക് താടിവടിക്കാന്‍ 100 രൂപ അയച്ചുനല്‍കി ചായക്കടക്കാരന്‍. താടി വടിക്കണമെന്ന് ആവശ്യപ്പെട്ട് മഹാരാഷ്ട്രയിലെ ബാരമതി സ്വദേശിയാണ് 100 രൂപ മണിയോര്‍ഡര്‍ ആയി മോദിക്ക് അയച്ചുനല്‍കിയതെന്ന് പ്രദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നു.

കൊവിഡ് 19-നെ തുടര്‍ന്ന് പ്രഖ്യാപിച്ച ലോക്ഡൗണില്‍ രാജ്യത്തെ അസംഘടിത മേഖല തകര്‍ന്നിരുന്നു. ഇതില്‍ പ്രതിഷേധിച്ചാണ് ഇത്തരമൊരു നടപടി. ഇന്ദാപുര്‍ റോഡിലെ സ്വകാര്യ ആശുപത്രിക്ക് സമീപം ചായക്കട നടത്തുന്ന അനില്‍ മോറെയാണ് മോദിക്ക് പണം അയച്ചു നല്‍കിയത്.

'പ്രധാനമന്ത്രി നരേന്ദ്ര മോദിയുടെ താടി വളരെയധികം വളര്‍ന്നു. അദ്ദേഹം എന്തെങ്കിലും വളര്‍ത്താന്‍ ഉദ്ദേശിക്കുന്നുവെങ്കില്‍, അത് രാജ്യത്തിന്റെ തൊഴില്‍ അവസരമാകണം. വാക്‌സിനേഷന്‍ നടപടികള്‍ ത്വരിതപ്പെടുത്തുകയും നിലവിലെ മെഡിക്കല്‍ സൗകര്യം വര്‍ധിപ്പിക്കാന്‍ ശ്രമിക്കുകയും വേണം. കൂടാതെ ലോക്ഡൗണില്‍ തകര്‍ന്ന ജനങ്ങള്‍ അതില്‍നിന്ന് മുക്തരായെന്ന് ഉറപ്പുവരുത്തണം.'', അനില്‍ മോറെ മോദിക്ക് അയച്ച കത്തില്‍ പറയുന്നു.

'രാജ്യത്തെ ഏറ്റവും ഉന്നത പദവിയാണ് പ്രധാനമന്ത്രിയുടേത്. നമ്മുടെ പ്രധാനമന്ത്രിയോട് അങ്ങേയറ്റം ബഹുമാനവുമുണ്ട്. അതുകൊണ്ടുതന്നെ എന്റെ സമ്പാദ്യത്തില്‍നിന്ന് അദ്ദേഹത്തിന്റെ താടി വടിക്കാന്‍ ഞാന്‍ 100 രൂപ അയച്ചുനല്‍കുന്നു. അദ്ദേഹം ഉന്നത നേതാവാണ്. അദ്ദേഹത്തെ വിഷമിപ്പിക്കാന്‍ എനിക്ക് ഉദ്ദേശമില്ല. പക്ഷേ, പകര്‍ച്ചവ്യാധി മൂലം ദിവസംതോറും തളരുന്ന ജനങ്ങളിലേക്ക് അദ്ദേഹത്തിന്റെ ശ്രദ്ധ ആകര്‍ഷിക്കുന്നതിന് പ്രധാന മാര്‍ഗമായി ഇതിനെ കണക്കാക്കുന്നു.', അദ്ദേഹം കൂട്ടിച്ചേര്‍ത്തു.

കൂടാതെ കൊവിഡ് ബാധിച്ച് മരിച്ചവര്‍ക്കുള്ള ധനസഹായം വര്‍ധിപ്പിക്കണമെന്നും അദ്ദേഹം ലോക്ഡൗണില്‍ ദുരിതത്തിലായ ജനങ്ങള്‍ക്കായി തുക വകയിരുത്തണമെന്നും അദ്ദേഹം ആവശ്യപ്പെട്ടു.



കൂടുതൽ വാർത്തകൾ വേഗത്തിലറിയാൻ ഞങ്ങളുടെ വാട്‌സ്ആപ്പ് ഗ്രൂപ്പിൽ അംഗമാകൂ

വാര്‍ത്തകള്‍ വേഗത്തില്‍ അറിയുവാന്‍ ഞങ്ങളുടെ ടെലഗ്രാം ചാനല്‍ സബ്‌സ്‌ക്രൈബ് ചെയ്യാന്‍ ഇവിടെ ക്ലിക്ക് ചെയ്യുക
Top